بابر اعظم نے خواتین کھلاڑیوں کو خود کو چیلنج کرنے کا آن لائن دیا مشورہ

پاکستان ٹی ٹوئنٹی ٹیم کے کپتان اور عالمی رینکنگ میں سرفہرست بلے باز بابر اعظم نے ویڈیو لنک کے ذریعے قومی خواتین کرکٹرز کو مشورے دیے اور میدان میں اپنی حکمت عملی کے حوالے سے بتایا۔

پاکستان ٹی ٹوئنٹی ٹیم کے کپتان اور عالمی رینکنگ میں سرفہرست بلے باز بابر اعظم نے ویڈیو لنک کے ذریعے قومی خواتین کرکٹرز کو مشورے دیے اور میدان میں اپنی حکمت عملی کے حوالے سے بتایا۔

کورونا وائرس کے سبب لاک ڈاؤن کی صورتحال کے دوران پاکستان کرکٹ بورڈ کی جانب سے منعقدہ ویڈیو کانفرنس کال میں 15 خواتین کرکٹرز نے شرکت کی۔

جیو نیوز کے مطابق 25 سالہ بیٹسمین نے خواتین بیٹرز کو مثبت سوچ کے ساتھ میدان میں اترنے کا مشورہ دیا اور کہا کہ کمفرٹ زونز میں رہنے کی بجائے خود کو چیلنج کریں۔

بابر اعظم نے کہا کہ وہ اب بھی دنیا کے ٹاپ بلے بازوں کی بیٹنگ دیکھتے ہیں، تاکہ کھیل کے دوران مختلف مراحل میں حکمت عملی بناسکیں۔

انہوں نے کہا کہ کیریئر کے تیسرے سال انہوں نے خود سے دنیا کا بہترین بیٹسمین بننے کا فیصلہ کیا تھا،اس تناظر میں خود کی بیٹنگ کا جائزہ لینا شروع کیا اور کوچز اور سینیئرز کے مشوروں سے سخت محنت کا آغاز کیا۔

 انہوں نے کہا کہ یہ ضروری ہوتا ہے کہ ہم ایک دوسرے کی مدد لیں، کیونکہ کئی مرتبہ ساتھی کھلاڑی آپ کو خامیوں کے بارے میں زیادہ مؤثر انداز میں بتاتے ہیں۔

 بابر اعظم نے کہا کہ وہ اب بھی پریکٹس کے دوران اپنے چھوٹے بھائی سے رائے لیتے ہیں، اسی طرح وہ امام الحق سے بھی پوچھتے رہتے ہیں، کیونکہ ہم دونوں ایک ساتھ کھیلتے رہے ہیں۔