بالی وڈ اسٹار سلمان خان: لاک ڈاؤن میں زندگی کا بگ باس شروع ہے
بالی وڈ اسٹار سلمان خان نے انسٹاگرام پر ایک ویڈیو شیئر کیا ہے جس میں انہوں نے کورونا وائرس کے خوف کے درمیان لاک ڈاؤن کی خلاف ورزی کرنے والوں کو دوسروں کی زندگی خطرے میں ڈالنے کی وجہ سے پھٹکارا ہے۔
بالی وڈ اسٹار سلمان خان نے انسٹاگرام پر ایک ویڈیو شیئر کیا ہے جس میں انہوں نے کورونا وائرس کے خوف کے درمیان لاک ڈاؤن کی خلاف ورزی کرنے والوں کو دوسروں کی زندگی خطرے میں ڈالنے کی وجہ سے پھٹکارا ہے۔
بی بی سی کی تفصیلات کے مطابق سلمان خان ان دنوں اپنی والدہ سلمیٰ خان، دونوں بہنوں ارپِتا اور الویرہ اور ان کے بچوں کے ساتھ پنویل میں واقع اپنے فارم ہاؤس میں رہ رہے ہیں۔
خیال رہے کہ انڈین ریاست مہاراشٹرا کا شمار ملک میں کورونا وائرس سے سب سے زیادہ متاثرہ ریاستوں میں ہو چکا ہے۔ وزیر اعظم نریندر مودی نے ملک گیر لاک ڈاؤن میں تین مئی تک توسیع کر دی ہے۔
سلمان نے بتایا ہے کہ ان کا پورا خاندان پِنویل میں ہی ان کے ساتھ رہ رہا ہے۔ تقریباً دس منٹ کے اس ویڈیو میں سلمان نے لاک ڈاؤن کے دوران فارم ہاؤس کے تجربات بھی شیئر کئے ہیں۔ ویڈیو کا آغاز ہی انہوں نے یہ کہتے ہوئے کیا ہے کہ ٹی وی کا بگ باس تو ابھی نہیں شروع ہو رہا ہے لیکن زندگی کا بگ باس جاری ہے۔ سب گھر میں بیٹھے ہیں۔
انہوں نے بتایا ہے کہ کس طرح وہ پانچ سے چھ کلومیٹر دور اپنے ایک جاننے والے سے سبزیاں خرید رہے ہیں۔ اسی سلسلے میں سلمان کے گھر کام کرنے والے ایک شخص نے پولیس سے بات کرتے ہوئے اپنا ماسک اتار دیا تو اسے ڈانٹ پڑی۔
سلمان نے اس ویڈیو میں بتایا ہے کہ میں نے ان سے ماسک اتارنے کو منع کیا تھا اور انہوں نے اس کی خلاف ورزی کی ہے۔
سلمان نے اس ویڈیو میں کورونا کے متاثرین کے بارے میں بھی بات کی ہے۔ انہوں نے کہا ہے کہ ان کا درد نہ سمجھ پانا انسانیت اور احساس کی کمی ہے۔ سلمان نے لاک ڈاؤن توڑنے والوں سے گھروں میں رہنے کے لئے کہا ہے۔
سلمان خان نے کہا ہے کہ کچھ لوگ ہیں جو کبھی گھر سے باہر نہیں نکلتے تھے لیکن ان دنوں نکل رہے ہیں۔
