معروف پاکستانی اداکار: اللہ نہ کرے ہمارے ڈرامے دوبارہ سنیما گھروں میں لگیں
پاکستان کے معروف اداکار و میزبان فہد مصطفیٰ نے کہا ہے کہ میں یہ نہیں چاہوں گا کہ ہمارے ڈرامے سنیما گھروں میں لگیں۔
پاکستان کے معروف اداکار و میزبان فہد مصطفیٰ نے کہا ہے کہ میں یہ نہیں چاہوں گا کہ ہمارے ڈرامے سنیما گھروں میں لگیں۔
جیو نیوز کے مطابق فلم "نامعلوم افراد" سے شہرت حاصل کرنے والے اداکار فہد مصطفیٰ نے حال ہی میں یوٹیوب کے ایک ویب شو پر انٹرویو دیا ہے، اس میں انہوں نے کہا ہے کہ ڈراموں اور فلموں کا کوئی موازنہ نہیں ہے۔
فہد مصطفیٰ نے مزید کہا ہے کہ مجھے بہت دکھ ہوتا ہے، اللہ نہ کرے کہ ہمارے ملک میں وہ حالات آئیں کہ ہمارے ڈرامے دوبارہ سنیما گھروں میں لگیں، ایسا معلوم ہوتا ہے کہ ہمارے پاس سنیما گھروں کے لئے کچھ نہیں ہے اس لئے ہم ڈرامے سنیما گھروں میں لگا رہے ہیں۔
ذرائع کے مطابق فہد مصطفیٰ نے کہا ہے کہ ایسا کر کے ہم ایک قدم پیچھے جا رہے ہیں، آپ یہ نہ سمجھیں کے ڈرامے سنیما گھروں میں لگا کر ہم ایک قدم آگے بڑھے ہیں۔
ان کا کہنا تھا کہ میں خود ڈرامے بناتا ہوں لیکن میں کبھی ایسا نہیں چاہوں گا، ہم نے جو 6، 7 سال اعتماد بنایا ہے اس طرح کرنے سے وہ ختم ہو جائے گا۔
واضح رہے کہ اداکار نے حال ہی میں اپنی آنے والی فلم ’قائد اعظم زندہ باد‘ کی شوٹنگ مکمل کی ہے اور اس فلم میں فہد کے مد مقابل ماہرہ خان ہیروئن کا کردار نبھا رہی ہیں۔
