پاکستان: وزیر اطلاعات نے کورونا سے نمٹنے کے لئے جاپانی امداد کا کیا خیر مقدم

پاکستان کے وزیر اطلاعات شبلی فراز نے کورونا وائرس سے نمٹنے کے لئے جاپان کی جانب سے بھیجی گئی 21 لاکھ 60 ہزار ڈالر کی امداد کا خیر مقدم کیا ہے۔

پاکستان کے وزیر اطلاعات شبلی فراز نے کورونا وائرس سے نمٹنے کے لئے جاپان کی جانب سے بھیجی گئی 21 لاکھ 60 ہزار ڈالر کی امداد کا خیر مقدم کیا ہے۔

دنیا نیوز کی تفصیلات کے مطابق پاکستان میں تعینات جاپان کے سفیر نے آج اسلام آباد میں وزیر اطلاعات شبلی فراز سے ملاقات کر کے دو طرفہ تعلقات اور باہمی دلچسپی کے امور پر تبادلہ خیال کیا ہے جبکہ دوران ملاقات کورونا وائرس اور لاک ڈاؤن کے تناظر میں موجودہ صورت حال کا بھی جائزہ لیا ہے۔

ذرائع کے مطابق شبلی فراز نے اس موقع پر کہا ہے کہ پاکستان جاپان کے ساتھ اپنے تعلقات کو انتہائی اہمیت دیتا ہے۔ انہوں نے جاپانی سفیر کو لاک ڈاون میں بتدریج نرمی کے حکومتی فیصلے سے بھی آگاہ کیا ہے۔

وفاقی وزیر نے ضلع مانسہرہ کے مستحق خاندانوں کے لئے ہنگامی امداد کے طور پر ساڑھے تین کروڑ روپے کی طبی معاونت فراہم کرنے پر جاپان کے سفیر کا شکریہ ادا کیا ہے۔ انہوں نے کورونا وائرس کی وبا سے نمٹنے میں جاپان کی 21 لاکھ 60 ہزار ڈالر کی امداد کا بھی خیر مقدم کیا ہے۔