پاکستان: معروف کرکٹر عمر اکمل کا معاملہ ڈسپلنری پینل کے سپرد
معروف پاکستانی کرکٹر عمر اکمل کا معاملہ ڈسپلنری پینل کے سپرد کردیا گیا ہے۔
معروف پاکستانی کرکٹر عمر اکمل کا معاملہ ڈسپلنری پینل کے سپرد کردیا گیا ہے۔
اے آر وائی کے مطابق پاکستان کرکٹ بورڈ (پی سی بی) نے عمر اکمل کا معاملہ ڈسپلنری پینل کے سپرد کردیا ہے۔
تفصیلات کے مطابق ٹیسٹ کرکٹر عمر اکمل کی مشکلات میں مزید اضافہ ہوگیا ہے، پی سی بی نے عمر اکمل کے معاملے کو ڈسپلنری پینل کے سپرد کردیا ہے۔
ذرائع کا کہنا ہے کہ ڈسپلنری پینل کے چیئرمین لاہور ہائی کورٹ کے سابق جج فضل میراں ہوں گے، چیئرمین ڈسپلنری پینل نوٹس آف چارج میں جرائم کی تصدیق کے بعد فیصلہ سنائیں گے۔
ذرائع کا مزید کہنا ہے کہ ڈسپلنری پینل کا فیصلہ آنے تک پی سی بی معاملے پر مزید کوئی تبصرہ نہیں کرے گا۔
واضح رہے کہ گزشتہ ماہ پی سی بی نے عمر اکمل کو اینٹی کرپشن کوڈ کے آرٹیکل 2.4.4 کی 2 مرتبہ خلاف ورزی کرنے پر چارج کردیا تھا۔
واضح رہے کہ یہ آرٹیکل کسی بھی فرد کی جانب سے کرپشن کی پیشکش کے بارے میں پی سی بی ویجلنس اینڈ سیکورٹی ڈیپارٹمنٹ کو (بغیر کسی غیر ضروری تاخیر سے) آگاہ نہ کرنا ہے۔
عمر اکمل نے دی گئی مہلت میں اپنا جواب پی سی بی کو جمع کروا دیا ہے، اور ذرائع کا کہنا ہے کہ عمر اکمل طے شدہ سزا پر اصرار کر رہے ہیں۔
بتادیں کہ عمر اکمل کو 20 فروری 2020 کو عبوری طور پر معطل کیا گیا تھا۔ عمر اکمل کو اینٹی کرپشن کوڈ کے تحت معطل کیاگیا تھا، اورانکوائری مکمل ہونے تک وہ کسی طرح کی کرکٹ میں حصہ نہیں لےسکتے ہیں۔
عمر اکمل کوئٹہ گلیڈی ایٹرز کا حصہ تھے، تاہم معطلی کے بعد انہیں ڈراپ کر دیا گیا تھا اور ان کی جگہ متبادل کھلاڑی شامل کیا گیا تھا۔