برطانیہ: چین کو کورونا سے متعلق مشکل سوالات کے جوابات لازمی دینے ہوں گے

برطانوی وزیر خارجہ ڈومینک راب نے کہا ہے کہ چین کو کورونا سے متعلق مشکل سوالات کے جوابات لازمی دینے ہوں گے۔

برطانوی وزیر خارجہ ڈومینک راب نے کہا ہے کہ چین کو کورونا سے متعلق مشکل سوالات کے جوابات لازمی دینے ہوں گے۔

جیو نیوز کے مطابق لندن میں میڈیا بریفنگ کے دوران ڈومینک راب نے کہا ہے کہ برطانیہ اور اس کے اتحادی وائرس پھیلنے پر چین سے سخت سوالات ضرور پوچھیں گے۔

برطانوی وزیر خارجہ اور برطانوی وزیر اعظم بورس جانسن کی علالت کے باعث عارضی طور پر وزیر اعظم کی ذمہ داریاں نبھانے والے ڈومینک راب نے کہا ہے کہ کورونا وائرس کے حوالے سے چین کو بتانا ہوگا کہ یہ کیسے ہوا؟ اور اس کو پہلے کیوں نہیں روکا جاسکا؟

ڈومینک راب نے مزید کہا ہے کہ کورونا وائرس کی وبا کے باعث حاصل ہونے والے سبق پر ہمیں گہرائی سے غور کرنا چاہیے۔

تفصیلات کے مطابق راب نے کہا ہے کہ کورونا کے باعث بین الاقوامی سطح پر تعاون کی اہمیت میں اضافہ ہوا ہے جب کہ وبا کے دوران چین سے اپنے شہریوں کی واپسی کے لئے دونوں ممالک نے اچھا کام کیا ہے۔

خیال رہے کہ امریکی صدر نے عالمی ادارہ صحت کی فنڈنگ روکنے کا حکم دیا ہے اور ڈبلیو ایچ او پر الزام لگاتے ہوئے کہا ہے کہ ڈبلیو ایچ او نے معاملے کو ٹھیک انداز میں ہینڈل نہیں کیا ہے اور جب وبا چین میں پھیلی تو اسے چھپایا جو ممکنہ طور پر دنیا میں وبا کے پھیلاؤ کا باعث بنا ہے۔

واضح رہے کہ چین نے 31 دسمبر 2019 کو عالمی ادارہ صحت کو کورونا کے حوالے سے اطلاع دی تھی اور اب تک کورونا دنیا کے 180 سے زائد ممالک میں پھیل چکا ہے جس کے باعث 21 لاکھ سے زائد افراد متاثر ہوچکے ہیں جب کہ ایک لاکھ 41 ہزار سے زائد افراد ہلاک ہوچکے ہیں۔