امریکی صدر: کورونا وائرس پرل ہاربر اور نائن الیون حملوں سے بھی زیادہ تباہ کن ہے
امریکی صدر ڈونلڈ ٹرمپ کے مطابق کورونا وائرس پرل ہاربر اور نائن الیون حملوں سے بھی زیادہ تباہ کن ہے۔
امریکی صدر ڈونلڈ ٹرمپ کے مطابق کورونا وائرس پرل ہاربر اور نائن الیون حملوں سے بھی زیادہ تباہ کن ہے۔
جیو نیوز کے مطابق امریکی صدر ڈونلڈ ٹرمپ نے کورونا وائرس کو امریکہ کے لئے پرل ہاربر اور نائن الیون کے حملوں سے بھی زیادہ تباہ کن قرار دیا ہے۔
امریکی صدر نے اپنے بیان میں مزید کہا ہے کہ جتنا نقصان کورونا سے ہوا ہے اس کی مثال امریکی تاریخ میں نہیں ملتی ہے۔
خیال رہے کہ امریکہ میں کورونا وبا سے ہلاک ہونے والے افراد کی تعداد 74 ہزار 800 سے زائد ہوگئی ہے، جبکہ 12 لاکھ 63 ہزار سے زائد افراد کورونا کے مریض بن چکے ہیں۔
یاد رہے کہ 7 دسمبر 1941 میں جاپانی فوج نے امریکی ریاست ہوائی کے شہر ہونولولو کی پرل ہاربر بندر گاہ پر حملہ کردیا تھا، حالانکہ اس وقت امریکہ جنگ عظیم دوم میں غیر جانبدار ملک تھا اور اس حملے کے اگلے روز ہی امریکہ جنگ عظیم دوم میں کود پڑا تھا۔
بتادیں کہ اس حملے میں مجموعی طور پر 2403 امریکی شہری (فوجی اور سویلین) ہلاک اور 1143 زخمی ہوئے تھے۔ امریکہ نے جنگ عظیم دوئم میں جاپان کے دو شہروں ہیروشیما اور ناگاساکی پر دنیا کی تاریخ میں پہلی بار ایٹم بم گرائے تھے جس کے بعد جنگ عظیم دوم اپنے اختتام کو پہنچی تھی۔
پرل ہاربر پر ہونے والا حملہ وہ حملہ تھا جس کے بعد امریکہ نے فیصلہ کرلیا تھا کہ اب وہ کسی کو بھی اپنے ملک میں حملے کی اجازت نہیں دے گا اور اس سے پہلے کہ کوئی ملک اس پر حملہ کرنے کی سوچے، امریکہ اسے فوری طور پر روکنے کے لئے اقدامات شروع کرے گا۔
اس نظریہ کے تحت امریکہ نے دنیا کے متعدد ممالک میں عسکری مداخلت کی اور اس کی وجہ اپنی قومی سلامتی کو خطرہ بتایا تھا۔ عراق اور افغانستان اس کی مثالیں ہیں۔
اس کے علاوہ 11 ستمبر 2001 میں امریکہ کے شہر نیویارک میں ورلڈ ٹریڈ سینٹر پر دہشتگردوں کا حملہ ہوا، جس میں 2977 افراد ہلاک اور 25 ہزار افراد زخمی ہوئے تھے۔
