پاکستان: ثناء میر نے کرکٹ کو کہا خیرباد
پاکستان ویمن ٹیم کی سابق کپتان ثناء میر نے تمام طرز کی کرکٹ سے ریٹائرمنٹ کا اعلان کر دیا ہے۔ سماء نیوز کے مطابق پاکستان کرکٹ بورڈ کی جانب سے پیر کو جاری کئے گئے بیان میں کہا گیا ہے کہ پاکستان ویمن ٹیم کی سابق کپتان ثناء میر نے اپنے 15 سالہ شاندار کرکٹ ک
پاکستان ویمن ٹیم کی سابق کپتان ثناء میر نے تمام طرز کی کرکٹ سے ریٹائرمنٹ کا اعلان کر دیا ہے۔
سماء نیوز کے مطابق پاکستان کرکٹ بورڈ کی جانب سے پیر کو جاری کئے گئے بیان میں کہا گیا ہے کہ پاکستان ویمن ٹیم کی سابق کپتان ثناء میر نے اپنے 15 سالہ شاندار کرکٹ کیریئر کو خیرباد کہہ دیا ہے۔
ثناء میر نے اپنے کیریئر میں 226 بین الاقوامی میچوں میں پاکستان کی نمائندگی کی ہے، انہوں نے 2009 سے 2017 تک 137 بین الاقوامی میچوں میں پاکستان خواتین کرکٹ ٹیم کی کپتانی بھی کی ہے۔
ثناء نے اپنے ایک روزہ کرکٹ کیریئر کا آغاز دسمبر 2005 میں کراچی میں سری لنکا کے خلاف کیا جبکہ آخری ایک روزہ میچ نومبر 2019 کو لاہور میں بنگلہ دیش کے خلاف کھیلا تھا۔
ثناء میر نے 120 ایک روزہ میچوں میں 151 وکٹیں حاصل کرنے کے ساتھ 1630 رنز بنائے جبکہ 106 ٹی 20 میچوں میں ان کی 89 وکٹیں اور 802 رنز بھی شامل ہیں۔
ریٹائرمنٹ کے فیصلے پر ثناء میر کا کہنا تھا کہ وہ تہہ دل سے پاکستان کرکٹ بورڈ کی مشکور ہیں جس نے انہیں 15 سال ملک کی نمائندگی کرنے کا موقع دیا، یہ ان کے لئے بڑے اعزاز اور فخر کی بات ہے۔
انہوں نے کہا کہ وہ سپورٹ اسٹاف، کھلاڑیوں، گراؤنڈ اسٹاف اور ہر اس فرد کا شکریہ ادا کرنا چاہتی ہیں جنہوں نے پس پردہ رہ کر ان کی کامیابی اور ویمنز کرکٹ کی ترقی میں اپنا حصہ ڈالا ہے۔
ثناء میر کا مزید کہنا تھا کہ وہ اپنے اہل خانہ اور مینٹورز کا بھی شکریہ ادا کرتی ہیں جن کے غیر مشروط تعاون نے انہیں عالمی سطح پر ملک کی نمائندگی سے متعلق خواب کو حقیقت میں بدلنے میں مدد دی ہے۔
انہوں نے یہ بھی کہا کہ وہ اس موقع پر اپنے ڈیپارٹمنٹ، زرعی ترقیاتی بینک لمیٹڈ کی بھی مشکور ہیں جنہوں نے پورے کیرئیر میں ان کا ساتھ دیا اور اگر ڈیپارٹمنٹل کرکٹ جاری رہتی ہے تو وہ اس کے ساتھ کام کرتی رہیں گی۔
ثناء میر نے اس طرف بھی اشارہ کیا کہ ان کے نزدیک زندگی میں آگے بڑھنے کا یہی بہترین وقت ہے، انہیں یقین ہے کہ وہ ملک اور کھیل کے لئے بہترین کردار ادا کرنے میں کامیاب رہی ہیں۔
دوسری جانب پاکستان کرکٹ بورڈ کے چیف ایگزیکٹو وسیم خان نے اس موقع پر کہا ہے کہ وہ ایک شاندار کیرئیر پر پاکستان کرکٹ بورڈ کی جانب سے ثناء میر کا شکریہ ادا کرتے ہیں۔ انہوں نے کہا کہ وہ نا صرف ایک طویل عرصہ پاکستان کی خواتین کرکٹ ٹیم کا چہرہ رہیں بلکہ نئی نسل کے لئے ایک قابل تقلید ایتھلیٹ بھی ہیں۔
