اے ڈی بی کورونا سے ہونے والے مالی خسارے کےلئے پاکستان کو 1.7 ارب ڈالر قرض دے گا
ایشیائی ترقیاتی بینک (اے ڈی بی)نے کورونا وائرس کی عالمی وبا سے ہونے والے مالی نقصانات کو برداشت کرنےکے لیے پاکستان کو رواں برس کے اختتام تک ایک ارب 70 کروڑ ڈالر قرض دینے پر اتفاق کیا ہے۔
ایشیائی ترقیاتی بینک (اے ڈی بی)نے کورونا وائرس کی عالمی وبا سے ہونے والے مالی نقصانات کو برداشت کرنےکے لیے پاکستان کو رواں برس کے اختتام تک ایک ارب 70 کروڑ ڈالر قرض دینے پر اتفاق کیا ہے۔
ڈان اخبار کی رپورٹ کے مطابق وزارت برائے اقتصادی امور نے کہا کہ ایشیائی ترقیاتی بینک نے کورونا وائرس کے رد عمل میں تعاون کے لیے پاکستان کو ایک ارب 70 کروڑ ڈالر فراہم کرنے کا وعدہ کیا ہے۔
ایشیائی ترقیاتی بینک بجٹ سپورٹ کے لیے 80 کروڑ ڈالر دے گا جو رواں برس جون میں منظور ہوگا اور دسمبر تک باقی90 کروڑ ڈالر دیے جائیں گے۔
بیان میں کہا گیا ہے کہ ایشیائی ترقیاتی بینک خصوصی رعایتی شرح پر بجٹ تعاون کو توسیع دے گا، یہ فیصلہ وزیر برائے اقتصادی امور مخدوم خسرو بختیار اور ایشیائی ترقیاتی بینک کے صدر ماساسوگو اساکاوا کی ملاقات کے بعد کیا گیا تھا۔
گزشتہ ماہ ایشیائی ترقیاتی بینک نے پرسنل پروٹیکٹو ایکو ئپمنٹ اور دیگر طبی سامان کی خریداری کے لیے پاکستان کے لیے 25 لاکھ ڈالر گرانٹ کی مںظوری دی تھی۔
یاد رہے کہ 13 اپریل کو ایشیائی ترقیاتی بینک (اے ڈی بی) نے ترقی پذیر ممالک کو کورونا وائرس کی وبا کے باعث معاشی نقصانات کے ازالے کے لیے 20 ارب ڈالر کا بڑا پیکج دینے کا اعلان کیا تھا، یہ ایک ارب 70 کروڑ ڈالر بھی اسی پروگرام کا حصہ ہے۔
ياد رہے کہ رواں ماہ کے اوائل میں ایشیائی ترقیاتی بینک نے خبردار کیا تھا کہ کورونا وائرس کے باعث عالمی معیشت کو 4 ہزار 100 ارب ڈالر نقصان کا خدشہ ہے اور امریکہ، یورپ اور دیگر بڑی معیشتیں شدید متاثر ہوں گی۔
