مفتی تقی عثمانی: کرونا وائرس کے سلسلے میں حکومتی ہدایات کے پابند ہیں
عالم اسلام کے ممتاز عالم دین مفتی تقی عثمانی نے کہا ہے کہ کرونا وائرس کے پیش نظر حکومت نے جو ہدایات جاری کی ہیں، ہم اس کے پابند ہیں۔
عالم اسلام کے ممتاز عالم دین مفتی تقی عثمانی نے کہا ہے کہ کرونا وائرس کے پیش نظر حکومت نے جو ہدایات جاری کی ہیں، ہم اس کے پابند ہیں۔
اے آر وائی کی تفصیلات کے مطابق عالم اسلام کے ممتاز عالم دین مفتی تقی عثمانی نے "الیونتھ آور" پروگرام میں گفتگو کرتے ہوئے کہا ہے کہ کرونا وائرس کے سبب حکومت نے جو ہدایات دی ہیں عوام کو اس پر عمل کرنا چاہئے۔
مفتی تقی عثمانی نے کہا ہے کہ نماز جمعہ کے اجتماعات پر پابندی کا فیصلہ سندھ حکومت نے طبی ماہرین کی رائے لینے کے بعد کیا ہے، ہم تمام ساتھیوں سے کہیں گے حکومت سندھ کے فیصلے پر عمل کریں۔
حضرت مفتی صاحب نے مزید کہا ہے کہ معاشرے میں برائیاں بڑھ گئی ہیں، اللہ کی آزمائش جاری ہے، ہمیں اپنی برائیوں اور کوتاہیوں پر اللہ سے معافی مانگنی چاہئے، اللہ ہمیں آزمائش سے گزرنے کی ہمت اور توفیق دے۔
واضح رہے کہ اس سے پہلے مفتی تقی عثمانی نے درخواست کرتے ہوئے کہا تھا کہ سوشل میڈیا پر مختلف علاج یا خبروں پرعمل نہ کریں، اور ذمہ داری کا مظاہرہ کرتے ہوئے انہیں آگے نہ پھیلائیں، اس معاملے میں طبی ماہرین کے مشوروں پر ہی عمل کریں۔
انہوں نے ہدایت کی ہے کہ گھروں میں بیٹھ کر لوگ روزانہ کم از کم 100 بار آیتِ کریمہ کا ورد کریں، خود کو گھروں میں مخصوص کرلیں اور کھانے پینے سے پہلے سنت نبوی ﷺ کے مطابق بسم اللہ پڑھیں۔
مفتی تقی عثمانی نے دعا کی کہ اللہ اہل وطن اور تمام انسانوں کو اس موذی وبا سے محفوظ رکھے۔
