پاکستان: مشہور اداکارہ ثمینہ احمد اور منظر صہبائی جیون ساتھی بن گئے

انٹرٹینمنٹ انڈسٹری کی مقبول ترین پاکستانی اداکارہ ثمینہ احمد اور پاکستانی اداکار منظر صہبائی رشتہ ازدواج میں منسلک ہوگئے ہیں۔

انٹرٹینمنٹ انڈسٹری کی مقبول ترین پاکستانی اداکارہ ثمینہ احمد اور پاکستانی اداکار منظر صہبائی رشتہ ازدواج میں منسلک ہوگئے ہیں۔

جیو نیوز کے مطابق منظر صہبائی اور ثمینہ احمد کے نکاح کی تقریب رواں ماہ کی 4 تاریخ کو لاہور میں سادگی سے منعقد ہوئی ہے، اس تقریب میں صرف ان کے گھر والوں نے شرکت کی ہے۔

ذرائع کے مطابق شادی کے حوالے سے اداکارہ ثمینہ احمد نے کہا ہے کہ اس تقریب میں میرے گھر والوں کے علاوہ کسی نے بھی شرکت نہیں کی ہے۔

تفصیلات کے مطابق نکاح کے خاص موقع پر اداکارہ ثمینہ احمد نے آف وائٹ رنگ کی ساڑھی پہنی تھی جب کہ منظر صہبائی نے بھی آف وائٹ شرٹ پر ویسٹ کوٹ پہن رکھا تھا۔

کورونا وائرس کی اس مشکل ترین صورتحال میں اس خبر کے سامنے آنے کے بعد سوشل میڈیا پر اداکارہ ثمینہ احمد کا نام ٹاپ ٹرینڈ بن گیا ہے اور صارفین کی جانب سے مبارکباد اور دعاؤں کا تانتا بندھ گیا ہے۔

خیال رہے کہ اداکارہ ثمینہ احمد پاکستان انٹرٹینمنٹ انڈسٹری میں 50 سال سے اداکاری کر رہی ہیں جب کہ ڈرامہ سیریل 'الف' میں قلب مومن کے دادا کا کردار نبھانے والے منظر صہبائی بھی متعدد ڈراموں میں اداکاری کر چکے ہیں جب ان کی ڈیبیو فلم 'بول' تھی۔